Боки 13 осомничен за рекет од 1,5 милиони евра за да влијае врз кривична постапка

По објавување на веста дека Борјан Јовановски, познат како Боки 13 и бизнисменот Зоран Милевски биле спроведени на информативен разговор на граничен премин, Јавното обвинителство, одржа прес конференција на која информираше за отворање на истрага против две лица, за земање 1,5 милиони евра за противзаконито влијание со користење на познанство со Јавен обвинител за влијание врз кривична постапка.

„Првоосомничениот го искористил своето познанство со јавен обвинител  и зел 1,5 милиони евра од лице под истрага, за да му ја олесни положбата. Второосомничениот овозможувал средби со лицето под истрага, кое во оваа истрага е сведок. Најпрво биле побарани 8 милиони евра, но откако добиле 1,5 милиони евра, осомничените се посомневале во доверливоста и  престанале со средбите.“, беше речено на пресот.

Првообвинетиот, кој е осомничен и за перење пари, со парите од рекетот си купувал облека, плаќал патувања и слично. За двајцата е побаран притвор.

На прашањето дали дошло до остварување на влијанието на Јавниот обвинител, Републичкиот ЈО, Љубомир Јовески рече дека  тоа дополнително во текот на истрагата ќе се испитува.

Запрашан дали оставката на специјалната обвинителка Катица Јанева има некаква поврзаност со овој случај, Јовески одговори дека оставката е нејзин личен чин и во тој дел нема што да коментираат.