Болницата во Гостивар подновена со опрема и апаратура вредна 50.000 евра

Општата болница „Д-р Ферид Мурад“ набави нова современа медицинска опрема и апаратура за потребите на неколку болнички одделенија.

Се работи за ехо-апарат со две сонди, и тоа линеарна сонда и конвексна сонда, кои ќе се користат во детското одделение, ЕКГ монитори за пациенти, четири инфузомати за поставување на 24-часовна доза на инфузија при примена на терапија и три перфузери за одредување на дозата на интравенска инјекција со шприц од 50 ml, кои ќе се користат во одделот за интерна медицина.

Инвестицијата е од буџетот на болницата, и изнесува околу 3.000.000 денари (50.000 евра).

„По добивањето на опремата, раководителот на одделот за детски болести д-р Ферит Муча и раководителот на интерно одделение д-р Јусуф Јакупи му се заблагодарија на менаџментот на болницата за оваа многу важна инвестиција, особено во овој период на пандемија која ќе служи за третманот на пациентите. Се надеваме и веруваме многу дека оваа инвестиција на почетокот на оваа година ќе биде добра иницијатива за многу други инвестиции и капитални проекти за 2021 година, кои се веќе планирани од страна на болницата и одобрени од надлежните институции.“, соопштија од менаџментот на болницата.