Божиќна честитка на Владиката г. Јосиф: Христос да не‘ чува од зло и закрилува секојдневно!

Митрополит г. Јосиф испрати пригодно обраќање до верниците во тетовско-гостиварската епархија по повод еден од најзначајните празници во православната црква Раѓањето на Исус Христос-Божиќ. Тој како надлежен архијереј честитајќи го празникот посака добро здравје, духовен спокој и мир за верниците.

„Оној кој го создаде човекот, станува човек и се раѓа како човек, за да го спаси човекот. Ние треба да гледаме со вера на тајната на Божественото во оплотување и без љубопитство да Го прославуваме Оној кој благоизволил да дојде меѓу нас. Христос нашиот вистински Бог кој слезе од небото и се роди во пештера повиен во јасли нека се застапи за секого од нас поединечно и за секое семејство од нашата Тетовско-гостиварска православна епархија. Нека Неговата десница нè чува од зло и Неговата семоќна десница нека нè закрилува секојдневно. Амин ! Христос се роди, Навистина се роди“, порача митрополитот.

Утре на денот на Христово Раѓање-Божиќ, владиката ќе отслужи празнична литургија во храмот Пресвета Богородица во Гостивар.