Бркање и казни за хранење, допирање или вознемирување на животните во скопската Зоолошка

Зоолошката градина во Скопје ги потсети посетителите на правилата кои треба да ги почитуваат, додека се наоѓаат во градината и кругот на живеалиштата на животните. Од пред неколку дена поставени се пет информативни табли на кои е испишан Кодекс на однесување за посетителите.

Хранењето на животните е строго забрането.

Не ги допирајте животните и не им приоѓајте близу.

Не удирајте по стаклата и оградите за да им го привлечете вниманието.

Не фрлајте предмети во нивните живеалишта.

Ова се само неколку од правилата кои се наведени на таблите.

Хранењето на животните со секаква храна од страна на посетителите, во минатото предизвикуваше здравствени проблеми кај животните, но и покрај апелите таквата навика не престануваше, па Зоолошка ги заострува правилата.

Во текот на денешниот ден, десетина лица биле избркани, бидејќи не го почитувале Кодексот и покрај забраната ги хранеле животните.