Брзата помош во Гостивар преполна – во една ноќ по 120 пациенти

Службите на Итната медицинска помош во Гостивар периодов имаат полни раце работа. Зголемен е бројот на пациенти кои се жалат на здравствени тегоби, најчесто предизвикани од жештините и наглите промени во временските услови. Дежурните служби прегледуваат од 110 до 120 пациенти во текот на една ноќ и во деновите од викендот.

„Најчесто доаѓаат пациенти со симптоми на малаксаност, повраќање, главоболка. Најпогодени се постарите лица, хронично болните и децата кои имаат послаб имунитет. За да го сочуваат своето здравје на граѓаните им препорачуваме во најтоплиот период од денот, од 11 до 17 часот да не излегуваат без потреба, да пијат доволно течности и да јадат полесна храна, а да избегнуваат мрсна и тешка храна“, вели д-р Лирим Беќири од Итната медицинска помош во Гостивар.

Променливото време какво што владее деновиве значи дополнителен ризик за оние кои страдаат од висок крвен притисок и срцеви заболувања. Лекарите советуваат дека тие лица треба да бидат посебно дисциплинирани во однос на препораките и редовно да ја земаат својата терапија.