Брзи ковид тестови ќе се набавуваат без оглас, со постапка на преговарање

Владата на вчерашната 21 седница го задолжи Министерството за здравство да спроведе постапка за јавна набавка на брзи антигени тестови за потребите на јавните здравствени установи со спроведување на постапка на преговарање без објавување оглас. Како што соопштија од владината прес служба ова е согласно членот 55 став (1) точка 6) од Законот за јавните набавки, според кој оваа постапка може да се спроведе „доколку поради крајна итност, предизвикана како резултат на настани кои договорниот орган не можел да ги предвиди, роковите за другите постапки не може да се применат“.

Владата, исто така донесе заклучок да се достави барање до Министерството за одбрана да дозволи дополнително распоредување на медицински лица од редовите на ова министерство за потребите на јавните здравствени установи во државата, со цел обезбедување целосна координација во врска со спречување на внесување и ширење на коронавирус.

Врз основа на препораката на Комисијата за заразни болести, Владата усвои измени и дополнувања на Протокол за превенција од инфекција и контрола за безбедно управување со телата на починати лица од КОВИД-19.