Буџет на општина Гостивар: Донесен едногласно, а останува предмет на „војна“

По неколку месеци неизвесност, буџетот на општина Гостивар беше усвоен денес, на десетина дена пред последниот законски предвиден рок. Иако беше донесен едногласно, политичките препукувања околу општинските пари не престанаа.  Мнозинството предводено од ДУИ и СДСМ изгласа одлука со која во буџетот се вметнаа одредени измени и скратувања на ставки за времени вработувања и трошоци. Градоначалникот Таравари тоа го искоментира како политичка одлука со која му се врши опструкција и која ќе предизвика отпуштања од работа. ДУИ пак реагираше дека измените и дополнувањата се однесуваат на средства кои можат да се пренаменат за инвестиции, да се избегнат кршења на закони и непродуктивни трошоци.

„Изгласан е буџет со измени со што ќе се попречи работењето на општината. Целта на мнозинството во советот и на централната власт е јас да бидам прикажан како неуспешен. Планираните 12 милиони денари во програмата за времени вработувања, по инсистирање на ДУИ и СДСМ направени се скратија на само една четвртина. За жал, ова ќе придизвика отпуштања на негувателки и воспитувачки во градинките, во противпожарната служба и на дел од моите соработници“, изјави Таравари по седницата на која беше донесен буџетот.

Од ДУИ велат дека измените не ја попречуваат работата на градоначалникот, детските градинки и јавните претпријатија, туку станува збор за пренасочување на средства од позиции кои не се корисни, во капитални инвестиции за доброто на  граѓаните

„Сегашниот буџет ги исклучува правните абнормалности, како и преоптоварувањето на општинската администрација и противпожарната единица со партиски војници , без работно искуство во време кога администратици со над 10 години работно искуство незаконски се преселени во простории надвор од општинската зграда. Пред се, буџетот беше одобрен во корист на жителите на Гостивар и се надеваме дека градоначалникот конечно ќе почне да работи.“, наведуваат од  ДУИ