Буриганга – најзагадената река на светот

Повеќе од 60.000 кубни метри токсична вода се влева во неа секој ден, како резултат на производство на разни индустрии, од кои една третина од отпадот припаѓа на кожарската индустријата.

Буриганга тече низ југозападниот дел на Дака – главниот град на Бангладеш, каде живеат околу 15 милиони луѓе. Долга е околу 18 километри, со просечна длабочина од 7,6 метри и максимум 18 метри.

Со оглед на тоа што поголемиот дел од територијата на Бангладеш ја сочинуваат речни системи со околу 700 реки, тие играат важна улога во транспортната инфраструктура на земјата, како и нејзиниот економски развој. Буриганга порано беше извор на енергија на Дака, но денес се смета за една од најзагадените реки во светот, која ги загрозува животите на луѓето и животните.

Имено, во Буриганга секој ден се исфрла околу 4500 тони секаков вид на ѓубре – од индустриски и медицински отпад, преку отпад од домаќинствата до фекалии. Во реката лебди стар отпад, пластика, мртви животни…

Загадувањето на реката негативно влијае и врз здравјето на луѓето кои живеат во нејзина близина. Како и да е, луѓето сè уште пловат по реката бидејќи немаат друг избор, покрај тоа ја користат за перење и миење садови.

Бангладеш е една од најсиромашните земји на светот и тешката индустрија вработува многу луѓе. Ова е причината зошто локалните власти не успеаа во регулирањето на проблемите со отпадот. Некои дури тврдат дека за реката Буриганга нема спас.