Чествување на 11 Октомври во Гостивар

По повод денешниот празник Денот на востанието и Ден на борецот, 11 Октомври, општинскиот одбор на Сојузот на борци организираше пригодно одбележување со положување на цвеќе на споменикот во градскиот парк и оддавање почит на загинатите за слобода.

„Денешново чествување го посветуваме на сите оние кои се бореа и ја изборија слободата, осветлувајќи го патот во новото време. Овој исклучителен датум од македонската историја го претставува почетокот на заедничкото организирање и масовно вклучување на македонскиот народ во вооруженото востание во името на повисоките идеали на слободата и правдата а за конечно создавање на македонска држава. Не сомнено 11 Октомври ги постави основите на нашата слобода и независност, настан кој ни овозможи самостојно да решаваме за нашата сегашност и иднина. Нека ни е честит 11 Октомври и нека ни е вечна татковината. Да живее Република Македонија.“, подвлече во обраќањето пред присутните, претседателот на боречката организаицја, Радислав Ѓиноски.

Поради пандемијата годинава, прославата на празникот во Гостивар помина без помасовен собир и културно-уметничка програма.