Чествување на Божиќ во Гостивар – сите обединети во желбата за здравје

Големиот христијански празник, Божиќ утрово традиционално се прослави во црквата „Успение на Пресвета Богородица“ во Гостивар со Света архиерејска литургија со која чиноначалствуваше Митрополитот тетовско-гостиварски г.Јосиф, во сослужение со свештенослужителите од гостиварското архиерејско намесништво.

Гостивар има тридецениска традиција на одбележување на денот на Христовото раѓање, но годинава прославувањето течеше под протоколи, верниците носеа маски, не се задржуваа во храмот долго време и изостана заедничката празнична трпеза, која вообичаено се организираше на крајот од литургијата.

Пред верниците, архиерејскиот намесник на гостиварското намесништво Марјанчо Мадевски го пренесе божиќното послание на поглаварот на МПЦ г.г. Стефан во кое меѓу другото се вели: „Нека годината којашто доаѓа биде време на победа над злото и над непријателствата коишто владеат со светот, да биде време благопријатно за изобилни духовни плодови и време во кое ќе заврши страдањето од подмолната болест; нека биде и време на благодарност до здравствените работници, чија саможртва треба да биде за пример.“

Владиката г.Јосиф честитајќи го светлиот христијански празник посака здравје и мир за сите. „Христос се роди-Навистина се роди!. Имајте радосен и благодетен празник. Нека е за многу години.“, порача Митрополитот г.Јосиф,.

Верниците кои присуствуваа на литургијата, со молитва за мир и спасение, запалија свеќи и оставаа дарови, а оние кои ги постеле шестнеделните пости се причестија.

Граѓаните со кои поразговаравме, без исклучок рекоа дека најважното што го посакуваат е доброто здравје и да заврши пандемијата.