Чествувањето на Денот на ослободување на Гостивар започна – Засадени 80 дрвца за 80 години слободен град

Со засадување на 80 дрвца во градскиот парк, во чест на 80 години слободен Гостивар, денес започна одбележувањето на Денот на ослободување на градот 18 Ноември.

Дрвцата ќе растат како симбол на цврстината, решителноста, пркосот, пожртвуваноста и борбата на минатите генерации, но и како потсетник и показател за идните, кои треба да ги следат вистинските вредности и да ги негуваат слободарските традиции.

Ова беше прва активност во низата, кои ќе се одржат по повод значајниот датум од историското минато на Гостивар, 18 Ноември.

Утре претпладне одбележувањето ќе продолжи со положување на цвеќе на споменикот на паднатите борци во НОВ. Потоа, во 12.30 часот во холот на ООУ „Гоце Делчев“ ќе се одржи музичко-сценска манифестација „Децата и младите за Гостивар“, со учество на децата од градинките и основците.

Централниот настан, Свечената академија ќе се одржи во Центарот за култура АСНОМ од 19 часот, додека пред тоа во фоајето на установата ќе има изложба на фотографии „Гостивар низ историјата“.