Четири месеци по 3.000 денари за социјално ранливи и невработени, парична помош и за пензионери со пониски пензии

Премиерот Димитар Ковачевски на денешната прес конференција најави дека новиот сет антикризни мерки опфаќа исплата на парична помош во период од 4 месеци за одредени социјално ранливи категории и пензионери.

„Со овој сет антикризни мерки пред се‘ обезбедуваме по 3.000 денари месечно наредни 4 месеци, за скоро 42 илјади граѓани. Тука спаѓаат лица кои користат право на социјална сигурност, корисници на право за попреченост, родители на деца со попреченост кои користат посебен додаток, нега од друго лице, со потешки трајни промени во здравствената состојба, самохрани родители корисници на гарантирана социјална помош, како и невработени. По 1.500 денари во наредните 4 месеци ќе добијат пензионерите кои добиваат пензија до 11.525 денари, а тоа се над 91.600 пензионери. Воедно, по 750 денари месечно ќе добијат пензионерите со пензии од 11.525 до 14.000 денари, а такви се над 66 илјади пензионери. За оваа мерка се издвоени над 12,2 милиони евра“, изјави Ковачевски.