Чистењето на патот околу Мавровско езеро отежнато, во Леуново заглавен автомобил на семејство со мали деца

Центарот за управување со кризи информира дека на бројот за итни повици 112 во 10:21 часот утрово, од Територијалната противпожарна единица Гостивар добиена е пријава за заглавени лица во снегот кај селото Леуново. „Исто така, во 11:43 часот, добиена е пријава и за заглавено возило (семејство со 2 мали деца) во снегот, пред Хотел Радика, Леуново.“, наведува ЦУК. Семејството ќе остане на безбедно додека се расчисти патот и се обезбеди проодност.

РЦУК Тетово извести дека од страна на ЈП за одржување на магистралните и регионалните патни правци добиле информација дека висината на снежната покривка е околу 80 см, и дека веќе работат на расчистување на патот околу Мавровско Езеро, но истото им е отежнато поради паднати дрвја на патот.

Инаку, од јавното претпријатие за одржување на патишта информираа дека со сите расположливи екипи се на терен и во континуитет се врши расчистување на државните патишта.

„По добиените информации од терен, сите државни патни правци се проодни за сообраќај, истиот се одвива во зимски услови и по влажни коловози“, велат од ЈП „Македонија пат“.

Оттаму апелираат до сите возачи да ги почитуваат законските одредби за одвивање на сообраќај во зимски услови, односно задолжително да поседуваат зимска опрема за возилата, внимателно да управуваат со возилата, да ја почитуваат поставената сообраќајна сигнализација и да ја прилагодат брзината кон условите на патот.