Чоколадни распукани колачиња

Овие колачиња се прават многу брзо и лесно, а уште побрзо исчезнуваат од чинијата.

Иако веќе се доволно ароматични, по желба можете да ги збогатите и со други омилени додатоци.

Потребни состојки:

• 170 гр темно чоколадо
• 115 гр путер
• 2 јајца
• 100 гр брашно
• 125 гр шеќер
• 20 гр какао
• 1 лажичка прашок за пециво
• 1/2 лажичка ѓумбир во прав
• 1 кафена лажичка цимет
• 1 лажичка екстракт од ванила
• прстофат сол
• шеќер во прав

Подготовка:

Во сад измешајте ги сувите состојки: брашно, прашок за пециво, какао, цимет, ѓумбир во прав и малку сол.

Чоколадото и путерот заедно растопете ги на пареа. Оставете да се изладат 10 минути, потоа додадете шеќер и добро измешајте.

Потоа во чоколадната смеса се додава едно по едно јајце, се меша убаво со рака, а потоа се додава екстрактот од ванила. На крајот постепено додавајте ги сувите состојки и сè убаво измешајте.

Ставете ја смесата во фрижидер најмалку два часа (можеби и преку ноќ) за добро да се стегне.

Извадете ја смесата со лажица и со раце обликувајте топчиња со големина на орев.

Топчињата се валкаат во шеќер во прав и се ставаат на плех обложен со хартија за печење. Не треба да ги притискате, но внимавајте растојанието помеѓу топчињата да биде најмалку четири до пет сантиметри, бидејќи при печењето ќе се шират.

Се печат во загреана рерна на 180 степени (по можност со вентилатор) околу 10 до 12 минути. Откако ќе се испечат, оставете ги малку да се изладат, па извадете ги од тавата и ставете ги на решетка да се изладат целосно.

Може да се ​​чуваат во затворена лимена кутија до 10 дена. Чоколадните колашиња се одлични со кафе, чај или варено вино.