Центар „Персона“ во Гостивар со бесплатна психолошка поддршка на деца што доживеале трауми во пандемијата

Мултиетничкиот Центар за психологија „Персона“ во Гостивар спроведува проект за бесплатна помош и поддршка на деца кои изгубиле блиска личност во периодот на ковид пандемијата. Психолозите сакаат да излезат во пресрет на дечињата кои доживеале трауми и да им помогнат во справувањето со тешките искуства.

„Пандемијата погоди многу семејства, а децата траумите ги чувствуваат најмногу. Затоа сакаме да им помогнеме и да им ја пружиме неопходната психолошка поддршка. Проектот е финансиран од донатор, кој сака да биде анонимен, едноставно целиме заедно да придонесеме за полесно надминување на кризите и траумите на тие деца кои изгубиле родител или некоја друга блиска личност“, рече психологот Блерита Мазлами.

Центарот е создаден од група млади психолози од Гостивар, а има мисија да придонесе за подобро ментално здравје, подигнување на свеста за психолошко советување, надминување на стравот и предрасудите околу барање стручна помош од ваков вид и слично.

„Ние сме мала мултиетничка група на психолози, која одлучи да ги спои силите, знаењата, способностите и професионализмот, за да дадеме максимум нашата заедница да биде што поздрава и напредна. Како здуржение имаме повеќе цели, но првенствено да ги осветиме луѓето кои имаат потреба од помош и поддршка дека може да ни затропаат на врата, и дека ние сме тука за нив. Освен психотерапија, работиме и со обуки за професионален развој, управување со стресот, едукација и слично“, кажа психологот Зана Мифтари Река.

Центарот за психологија Персона почна со работа во јули годинава, а денес во канцелариите коишто се наоѓаат во зграда зад Домот на културата организираше Отворен ден за да ја претстави својата работа пред граѓаните на Гостивар.