ЦРППР: Градежните работи во Русино се очекува да завршат до крајот на август

Центарот за развој на Полошкиот плански регион (ЦРППР), информира за состојбата со  управувањето со отпадот во Полошкиот плански регион и нестандардната депонија Русино. Како и за пречките со кои се соочува Заедничкото јавно претпријатие Русино/Полог.

„Градежните работи за изведба на брзи мерки за санација на депонијата Русино се одвиваат согласно динамичкиот план. Досега, беа реализирани подготвителните работи, поставена е колска вага за мерење на количината на отпад, а во тек е изградба на насипите и воспоставување на системот за рециркулација на исцедокот. Градежните работи според динамичкиот план се очекува да завршат до крајот на август 2021. Со заокружувањето на овој процес, конечно ќе се спречи деградацијата на животната средина која е предизвикана од неконтролираните пожари и излевањето на исцедокот од депонираниот отпад“, информираат од ЦРППР.

Од центарот за развој на полошкиот плански регион уште напоменуваат дека неисполнетите финансиски обврски на Општините Маврово и Ростуше, Брвеница и Врапчиште претставуваат пречка претпријатието Русино/Полог да продолжи со работа.

„Со депонијата ќе управува Заедничкото јавно претпријатие Русино/Полог. Процесот на основање на претпријатието е завршен. Во тек е постапка за наплата на доспеаните обврки на деветте општини од полошкиот регион по основ на иницијалниот влог кој што е предуслов за претпријатието да започне со кадровско екипирање и воспоставување на систем за работа и контрола на депонијата. Општините Тетово, Гостивар, Боговиње, Теарце, Желино и Јегуновце изминатиот месец ги подмирија своите обврски, додека Општините Маврово и Ростуше, Брвеница и Врапчиште сеуште немаат извршено транфер на средства, што всушност претставува пречка претпријатието да продолжи со работа според зацртаната програма“, се вели во соопштението.