Црвен Крст Гостивар: Лицата со попречености да се пријават да добијат личен асистент

Заинтересираните граѓани со попречености од гостиварското подрачје, да ја искористат можноста и да се пријават за да им се обезбеди личен асистент, апелираат од Општинската организација на Црвениот Крст во Гостивар. Организацијата е вклучена во програмата „Персонална асистенција на лица со попреченост ”, како провајдер на услуги. Неодамна заврши новиот круг на обуки за лични асистенти, кои успешно ги завршија девет кандидати и се стекнаа со сертификати. Тие им стојат на располагање да им помагаат во секојдневни активности и обврски на граѓаните со инвалидитет.

„Ова е навистина една убава можност, којашто треба да се искористи. Апелираме лицата со попречености, коишто имаат потреба од персонални асистенти да се пријават во Центарот за социјална работа. Лични асистенти во Гостивар година и половина веќе користат шест лица, а сега имаме нови девет обучени асистенти, кои се подготвени да им помагаат на граѓаните што ќе се пријават“, рече Мелита Алили, секретар на гостиварскиот Црвен Крст.

Програмата „Персонална асистенција на лица со попреченост ” ја реализира  Министерството за труд и социјала, во соработка со Агенцијата за вработување.

Целта е да се овозможи, независно и самостојно живеење на граѓаните со инвалидитет, како и нивно активно и рамноправно учество во заедницата и во општеството.  Од друга страна им се дава можност на невработени лица, бесплатно да се стекнат со вештини и знаење за лични асистенти и потоа со ангажманот да добиваат месечен надоместок.