Црвен крст Гостивар со апел до излекуваните од COVID: Дарувајте крвна плазма, спасете живот!

Општинската организација на Црвениот крст во Гостивар упати апел за крводарување до граѓаните кои се избориле со COVID-19 да даруваат конвалесцентна плазма. Лицата кои се излекувани од  инфекцијата, во нивната крв имаат супстанци наречени антитела кои се способни да се борат со вирусот, затоа нивната плазма е драгоцена во борбата со коронавирусот, нагласуваат од организацијата.

Кој може да дарува конвалесцентна плазма?  

Лица оздравени од инфекција COVID-19 кои ги исполнуваат стандарните услови за дарување (да немаат акутна или хронична болест, да се на возраст од 18 до 65 години, телесна тежина над 55 килограми) и дополнителните критериуми:

• да имаат документиран лабораторски доказ дека биле болни од COVID-19

• позитивен PCR тест или позитивен тест за антитела

• да се поминати најмалку 28 дена од последен симтом (или повеќе во зависност од клиничката слика).

Пред дарувањето се прават потребните испитувања, а самиот чин на дарување крв е вообичаен и безбеден според сите протоколи и мерки за заштита, секој може да спаси нечиј живот по закрепнувањето од болеста предизвикана од вирусот КОВИД -19.

Крводарителите може да се обратат секој понеделник и четврток во Службата за трансфузиона медицина во Гостивар.