ЦУК: Запрено производството и истекот на вода од ХЕЦ „Вруток“ поради висок водостој на Вардар

Центарот за управување со кризи како превентивна мерка од можни излевања на Вардар во Полог, координираше целосно да се сопре производството на електрична енергија и истекот од ХЕЦ „Вруток“ за да нема дополнителен прилив на вода од акумулациите во коритото на реката Вардар, освен тоа што е од дождовите.

• Нивото на реката Вардар е високо и градоначалниците во Полошко, согласно тоа, е очекувано превентивно да се подготвуваат за можните излевања да не бидат на штета на населените места во Полошката котлина. Конкретно, според последните добиените податоци во ЦУК од хидролошките станици низ земјава се уште е висок водостојот во горниот дел од сливот на реката Вардар и таму се очекуваат локални излевања на реката, особено во Полошката Котлина. Исто така, во Скопје на реката Вардар е регистриран прилично висок водостој и е можно, речиси до горе, да биде исполнето со вода првото (минор) корито на реката, предупредуваат од ЦУК.

На останатите водотеци има намалување или стагнација на водостоите во однос на утринските, информираат од Центарот за управување со кризи.