Д-р Цана: Во пандемија не треба ниту да се размислува да се прават свадби и собири

Ризикот за ширење на коронавирусот при поголеми собири е огромен, предупредуваат лекарите. Особено ако се има предвид дека состојбата периодов секојдневно станува се‘ посериозна и бројката на заразени не е за занемарување.

„Општа констатација е дека состојбата е крајно загрижувачка, тоа го покажуват секојдвените бројки на заразени и хоспитализирани, се рушат рекорди. Наредните денови, недели и да не велам месеци, ќе бидат период кога секојдневно ќе имаме нови бројки кои ќе бидат поголеми од претходните. Единствен апел од општата проценка на состојбата би бил, максимално да се придржуваме до тие три златни правила (маска, дистанца, хигиена), кои се единствено оружје, научно докажано во заштитата против ширење на коронавирусот. Во услови на пандемијата за организирање на свадби, собири со повеќе од 10 луѓе не треба ниту да се размислува, а не да се прават. Службите кои се одредени за контрола на спроведување на мерките и препораките треба да бидат ригорозни во тој правец. Ризикот е голем.“, изјави при вчерашната посета на Гостивар, инфектологот Фадил Цана.

Сепак и покрај забраните, факт е дека се организираат свадби и други семејни веселби и собири. Изминатиот период во угостителски објект во гостиварско, во два наврати полицијата и пазарните инспектори затекнаа свадби со над 100 гости. Сопственикот два пати беше лишен од слобода и се соочува со кривична пријава, објектот беше затворен.

Според последните податоци од Министерството за здравство, заклучно со вчера регионот на Гостивар има 340 активно заразени со ковид.