Д-р Хатије Исмаили прогласена за почесен граѓанин на Гостивар

Со одлука на општинскиот Совет донесена едногласно на денешната седница, гинекологот Хатије Исмаили беше прогласена за почесен граѓанин на Гостивар. Докторката потекнува од Гостивар, а во Словенија кадешто живее и работи, минатата година доби државна награда за најдобар лекар.

„Изминатиот период остварив средба со доктор Хатије Беџети Исмаили во нашата општина и разговаравме за нејзината кариера и достигнувања во областа на медицината. Докторката заслужува да биде прогласена за почесен граѓанин, затоа што со својот ангажман, го промовира Гостивар во држава каква што е Словенија, каде медицината е на многу напредно ниво“, рече во обраќањето градоначалникот Арбен Таравари.

Хатије Исмаили завршила средно образование во гостиварската гимназија, а образованието го продолжила медицинскиот факултет во Ријека, Хрватска. Специјализирала гинекологија во Словенија, каде и денес работи и живее со своето семејство.