Д-р Максимоска: Дијабетот е „тивок убиец“, намалете ги ризиците

„Долготрајно зголемените нивоа на шеќер во крвта практично не се чувствуваат, но предизвикуваат големи оштетувања, пред сѐ, на крвните садови ‒ компликации и намалување на квалитетот и должината на животот. Денес е 14 ноември, Светски ден на дијабетесот и нашата цел со денешнава панел дискусија е насочена кон зголемување на свеста за намалување на ризик факторите и одложување на појавата на дијабетес како и превземање на превентивни мерки за намалување на комликациите кај пациетите со дијабетес.“, порача на панел дискусијата што се одржа денес во Гостивар, д-р Слаѓана Максимоска, специјалист ендокринолог.

Настанот го организираше Здружението „When in Trouble“ по повод Денот на борба против дијабетот.

„Сакаме да го насочиме вниманието, да ја поткренеме свеста за да може превентивно да делуваме кај граѓаните, затоа што дијабетот е подмолна болест и ги напаѓа сите органи, а од друга страна со почитување на препораките на стручните медицински лица може превентивно да делуваме, и секој пациент може нормално да функционира и да живее“, рече претседателката на здружението, Билјана Беловинова.

Стручните лица појаснуваат дека симптомите кај дијабетес тип 1 и тип 2 не се појавуваат со ист интензитет.

„Имаме неколку типови на дијабет, тип 1 кој обично се јавува кај младите, тип 2 кај постари и гестациски којшто се јавува во втор или трет семестар од бременоста. Она што е важно да кажеме дека при дијабет тип 1 симптомите се јавуваат многу брзо и побрзо се поставува дијагнозата, додека кај дијабет тип 2 симптомите долго години може да бидат непрепознаени, и болеста да биде откриена при рутински контолри или кога ќе се јават компликации како мозочен или срцев удар. Најчестите симптоми се често мокрење, преголема жед, заматен вид, намалена концентрација. Кога зборуваме за превенција на дијабетесот, веднаш да кажеме дека не постои ефикасна превенција за дијабетес тип 1. Превентивните мерки се насочени кон превенција од дијабетесот тип 2. Прво и основно е да се внимава на исхраната, да се одржува нормална телесна тежина и да се применува редовна физичкa активност.“, подвлече д-р Максимоска потврдувајќи дека се‘ почесто има и случаи на бебиња со ризик од дијабет од самото раѓање, поради гестациски дијабет кај мајката:

„Има пораст на бебиња кои се со ризик од дијабет поради гестациски дијабет. Гестациски значи дека мајката го немала претходно, се јавил во бременоста. Поради нездравиот начин на живот, лоша исхрана, намалена физичка активност имаме и зголемен број на пациентки со гестациски дијабет, кој потоа е ризик за бебето“.

Пред почетокот на настанот присутните имаа можност бесплатно да измерат ниво на шеќер во крвта.