Да добиваат подетални материјали за да развиваат подобра дискусија, побараа советниците на Општина Гостивар

Финансии, образование, урбанизам, работата на ЈП „Комуналец“ беа областите на кои се однесуваа точките што ги разгледуваше Советот на Општина Гостивар на денешната седница, седма по ред на новиот состав.

Советниците изгласаа одлука врз основа на која Општина Гостивар презема обврска за плаќање на електрична енергија за пумпите за вода во селата Чегране и Форино. Како што беше образложено, овој чекор е во насока жителите да не останат без вода. Менаџирањето со водоводната мрежа во овие села треба да се префрли на гостиварски „Комуналец“, со оглед дека претпријатието „Хигиена“ не е активно подолго време.

На седницата беа усвоени и годишните планови за вработувања во 2023-та година на училиштата: „Единство“ и „Исмаил Ќемали“ во градот и „Прпарими“ во Чегране. Во однос на Комуналец донесени беа: согласност  за Одлуката за утврдување на вредноста на бодот за пресметување на платите на вработените во претпријатието, завршна сметка  и Финанскиски извештај за 2021 година и Ценовник на услуги за градежни работи од ЈП Комуналец.

Дел од советниците во своите обраќања нагласија дека при најави на седниците треба да им се доставуваат подетални материјали за точките на дневен ред, односно извештаи, програми, планови за да може да ги разгледуваат и да развиваат дискусии базирани на факти. „Дебатата е додадена вредност на парламентарната демоктарија“, истакна при тоа, претседателот на Советот, Ваљбон Лимани и побара од административните служби да ги доставуваат сите неопходни материјали до советниците.

Советот денес, исто така донесе одлука за доделување на финансии на Здружението на граѓани “Интеграција на Ромите” за организирање на одбележување на Денот на Ромите во Гостивар.