„Да ја продолжиме традицијата“, настан во Гостивар посветен на жените од руралните средини

Припаднички на понежниот пол од рурални средини од општините Гостивар, Маврово- Ростуше, Центар Жупа и Дебар, денес се собраа на заедничка манифестација насловена „Да ја продолжиме традицијата“. Настанот го организираше здружението на жени фармери „Моја Фарма“ од Гостивар, со цел да се презентира традиционалната кујна, органски произведена храна и ракотворби, како и да охрабри економското јакнење на жените од руралните средини низ дебата за предизвиците и можностите кои ги имаат. Истовремено за дружење без оглед на вера и нација и разменување искуства.

„Жените од руралните средини континуирано се соочуваат со ограничувања и проблеми поради стереотипите и традицијата од средината во која живета, а тие се столб во производството на безбедна земјоделска храна. Тие сочинуваат значителен дел од земјоделската работна сила, која во најголем број случаи е неплатена семејна работна сила, се грижат за старите изнемоштени лица и за своите деца во кругот на семејството, но за жал гласот на руралната не се слуша. Од сетоа тоа произлегува дека жените од руралните средини можат да бидат толку продуктивни, но не се економски зајакнати и силни за да бидат далеку препознаени и вреднувани“, истакна Ранкица Божиноска, членка на здружението „Моја фарма“.

За своите искуства како жена земјоделка, проблемите, тешкотиите и перспективите на руралните пред присутните зборуваше Живка Ѓурчиновска од гостиварско Тумчевиште, претседателка на „Моја фарма“.

„Предизвици има многу и тие се големи, но ние не се откажуваме. Секоја работа што ќе ја фатиме, ја тераме до крај, затоа што сме добар и посветен тим. Така ќе продолжиме и во иднина, оосбено со акцент на младината, со проекти за нив“, рече Ѓурчиновска.

Жените учеснички презентираа најразлични традиционални специјалитети, пити, колачи, зимница, органски зеленчук и овошје, како и уникатни ракотворби карактеристични за крајот од кој што доаѓаат.

Проектот „Да ја продолжиме традицијата“ се спроведува по трет пат со поддршка на Министерството за земјоделство, шумарство и водостопанство.