Да нема дупло плаќање на гробиштата во Гостивар, предлог на советникот Адеми

Треба да се намали финансискиот товар кој граѓаните го имаат за гробиштата при отворање на нов гроб, смета советникот од АА во Советот на Општина Гостивар, Зулфи Адеми. Тој на последната седница даде предлог граѓаните да се ослободат од плаќањето што го вршат приватно, а отворањето на гробовите да се врши само во рамки на претпријатието  „Комуналец“.

„За отворање на нов гроб граѓаните плаќаат сума од 13.000 денари во ЈП Комуналец и на приватно уште околу 250 евра. Сметам дека услугата треба да се спроведува само преку претпријатието, да се ослободат од плаќање на приватно, отворањето на гробовите да биде во рамките на претпријатието „Комуналец“ и граѓаните да вршат само една уплата во претпријатието, а не две плаќања (приватно и во претпријатието). На тој начин ќе се намалат трошоците.“, рече Адеми во изјава за Gostivarpress.mk.

Предлогот допрва ќе се разгледува и за него ќе се одлучува на некоја од наредните седници.

Адеми дополни дека е потребно и формирање на посебно јавно претпријатие за гробишта и гробни услуги, што исто така ќе го формализира како предлог.