„Да се вратиме на традицијата“ , работилница за рачна изработка на керамика во Гостивар

Уметници и граѓани во Гостивар изминатите десетина дена имаа можност да се вклучат во работилница за рачна изработка на керамика. Тие имаа можност бесплатно да го научат процесот на изработка на најразлични керамички садови, како и техниките за декорација. Работилницата беше прва од ваков вид во гостиварскиот регион и пошироко и побуди голем интерес кај гостиварци.

„Се вклучија околу 15 уметници како и многу граѓани и навистина ми е драго што работилницата помина успешни. Учесниците работеа под менторство на познатот уметник, професорот Колевица од Корча кој беше задолжен за изработката и неговата сопруга Андонета за декорирањето. “, вели скулпторот Џезаир Реџепи, идеен творец и организатор на активноста.

Работилницата се одржа под мотото „Да се вратиме на традицијата“.

Во следните денови керамичките садови ќе го поминат процесот на печење за да ја добијат конечната форма. Секој од учесниците во работилницата ќе си понесе по една своја изработка, како спомен и потсетување дека традицијата треба да се негува и да не се заборави.

Оваа активност во Гостивар се реализираше со поддршка на Министерството за култура.