Данска четврти пат по ред светски шампион во ракомет

Ракометната репрезентација на Данска триумфираше на Светското првенство, откако во финалето во Осло ја совлада селекцијата на Хрватска со 32:26. Со оваа победа, Данците ја потврдија својата доминација на светската ракометна сцена, освојувајќи ја титулата по четврти пат во низа.

Данска го освои златото на импресивен начин, без ниту еден пораз, победувајќи на сите девет натпревари. Оваа генерација покажа неверојатна доминација, а уште минатото лето го освои и олимпискиот турнир во Париз.

Финалето против Хрватска беше решено уште во првото полувреме, кога Данците стекнаа предност од 16:12, а клучната разлика ја направија на почетокот на вториот дел, зголемувајќи на +10 (24:14). Иако Хрватите успеаја да го намалат заостатокот, победата на Данска во ниту еден момент не беше доведена во прашање.

Најдобар во победничкиот состав беше Гидсел со 10 голови, додека Јакобсен постигна пет. Во хрватската репрезентација, најефикасни беа Мариновиќ со шест и Шоштариќ со пет голови.

Хрватска, иако неочекувано стигна до финалето, може да биде задоволна со сребрениот медал. Ова е нивно шесто загубено финале, а единствената светска титула ја освоија во 2003 година.

Во борбата за бронзата, Франција ја совлада Португалија со 35:34.