„Дарувај Крв“ – мобилна апликација за крводарители на гостиварецот Александар Богданоски

„Дарувај Крв“ е нова мобилна апликација наменета за сите оние што даруваат или сакаат да даруваат крв. Зад неа стојат гостиварецот Александар Богданоски, активистот и програмер Горјан Јовановски, заедно со Стефан Велковски, како и здружението на крводарители и поддржувачи на крводарителството „Крводарител“ – Скопје.

Преку апликацијата, секоја недела ќе се објавуваат крводарителни акции што се организираат низ Македонија од разни здруженија, со цел дарителите да бидат навремено известени каде и кога може да се дарува крв и помогнат да се спаси нечиј живот.

Во моментов достапна e само за Андроид уредите, но наскоро ќе биде достапна и за iOS. Андроид апликацијата може да ја преземете на веб страницата на daruvajkrv.mk, од Google Play или од ТУКА.

Она што е во најава како новитет во новата верзија, која треба да биде надградена наскоро се инстант нотификациите кои ќе го известуваат секој корисник на оваа апликација, кога во неговиот град ќе има акција за дарување или побарување на одредена крвна група. 

„Она што недостасуваше кај нас е токму ваква апликација, преку која корисниците на едноставен начин ќе бидат известени за сите крводарителски акции и настани како од здруженија така и од институциите. Очекуваме соработка од сите кои може да придонесат за општото добро. Во моментов работиме и на изнаоѓање решение како да се поедностави начинот за граѓаните кои имаат можност да даруваат ковалесцентна плазма, да се информираат преку апликацијата за чекорите на дарување, и со тоа да помогнат на оние на кои навистина им е потребна во борбата против кови-19.“ – вели Александар, дел од тимот.

Да спасиме живот, да донираме крв! Преземи ја апликацијата „Дарувај Крв“ уште денес!