Дебата во Гостивар: Комунална полиција и отповикување на градоначалници на референдум

Поголеми ингеренции на комуналниот надзор во општините, комунална полиција и можност да се отповикуваат градоначалниците со референдум. Ова се дел од новините предвидени со измените и дополнувањата на Законот за локална самоуправа за кои денес се дебатираше во Гостивар. Во настанот учествуваа министерот за локална самоуправа Златко Перински, градоначалникот на Гостивар Ваљбон Лимани, претставници на други полошки општини, невладин сектор и експерти.

„Целта е да ја зголемиме транспарентноста и отчетноста на градоначалниците, да овозможиме поголема инклузивност во креирањето политики и одлуки заедно со граѓаните, да ја препознаеме комуналната полиција или комуналниот надзор и поголема отвореност во насока на креирање на политиките од страна на градоначалниците, поголема отвореност кон граѓаните. Приоритет во отворање на овој закон е можноста за отповикување на градоначалниците на референдум. Тоа е многу важно, затоа што во моментов сме сведоци, за среќа на мал број градоначалници, кои девијантно се однесуваат и ја злоупотребуваат дадената доверба од страна на граѓаните.“, изјави министерот Перински.

Првиот човек на Гостивар Лимани смета дека отповикувањето на градоначалници на референдум е добра идеја во случаи на злоупотреби на функцијата.

„Во момент кога некој градоначалник излегува надвор од рамките на своите надлежности и ја злоупотребува довербата на народот, а поголем број на граѓани се согласни дека тој градоначалник навистина ја злоупотребува функцијата зошто да не биде отповикан. Потоа, на избори граѓаните ќе имаат можност да му дадат шанса на друг градоначалник“, рече Лимани.

Во однос на можноста да се формира комунална полиција, беше истакнато дека оваа мерка ќе придонесе за поголема хигиена во општините и јакнење на свесноста кон јавното добро, односно да не се уништува урбаната опрема.

Настанот се организираше од страна на Министерството за локална самоуправа, со поддршка од проектот „Зајакнување на општинските совети“, финансиран од Владата на Швајцарија и Министерството за локална самоуправа, а кофинансиран и имплементиран од Програмата за развој на Обединетите нации – УНДП, во соработка со други национални институции и ЕЛС.