Дечињата во Гостивар со песна го најавија Христовото раѓање (фото)

Дечињата денес создадоа празнична атмосфера и расположение низ гостиварските улици, најавувајќи го со песна утрешниот празник Божиќ, денот на Христовото раѓање.

Поворката тргна од Црквата Пресвета Богородица на градскиот плоштад, се движеше низ улиците „Илинденска“ и „Гоце Делчев“ и заврши во црквата Св.Петка кај железничката станица. Децата ги симболизираат ангелите, на чело на поворката ја носеа Витлеемската пештера, а носеа и божиќни ѕвезди што ја симболизира ѕвездата која ги водела тројцата мудреци до местото каде што бил роден Исус. Ги имаше од сите возрасти, дојдени да учествуваат во оваа возобновена православна традиција.

Придружувани од свештенослужителите од гостиварското архиерејско намесништво, најмалите гостиварци со радост и со гордост ја пееја коледарската песна Вечниот Бог.