Дечињата во гостиварските градинки бесплатно ќе учат англиски и музичко

Од новата учебна година во јавните детски градинки во Гостивар, изучувањето на англискиот јазик и музичкото образование ќе бидат бесплатни. Часови по овие предмети, соодветни за возраста на дечињата се организираа и претходно, но трошокот паѓаше врз грбот на родителите.

„Сите деца бесплатно ќе може да следат настава на англиски јазик и музичко воспитување, а  трошоците ќе ги покрие општината. Се надевам дека на ваков начин ќе придонесеме за доедукација на децата и финансиски ќе им олесниме на родителите. Како општина постојано инвестираме во градинките за децата да добијат услови за згрижување според сите стандарди. Преку последниот проект реализиран со средства од Светска банка, набавена е нова опрема за кујните, мебел и дидактички материјал. Минатата година пак, направивме реконструкција на тоалетите, а со подобрување на условите ќе продолжиме и понатаму“, изјави градоначалникот Арбен Таравари.

Во трите јавни детски градинки во Гостивар „Пролет“, „Цветови“ и „Пчелка“, како и во Центрите за ран детски развој запишани се околу 750 дечиња.

Гостиварските градинки, како и останатите во земјава, поради пандемијата со Ковид 19 не работат од 11 март. Неделава ќе се спроведе скринингот за коронавирус на вработените во градинките, а одлуката кога повторно ќе бидат отворени се чека од Владата.