Децата немаат почит, ни дисциплина, родители разбудете се! Аларм од психолозите

Последниот шокантен случај во Србија, кога 13 годишно момче со пиштол, во училиште усмрти осум ученици и чувар, отвори многу прашања и покрена дебати околу тоа: што ги поттикнува децата на насилство, зошто имаат толку негативни чувства, омраза и гнев во себе, колку родителите им обрнуваат внимание, која е улогата на училиштата во градењето на една личноста итн…

Психолозите алармираат дека е крајно време, родителите да почнат да посветуваат повеќе време на своите деца, да им всадуваат вредности на почит, да ги научат на дисциплина, да воспостават поголема контрола на тоа што децата гледаат на телефоните, да разговараат со нив на разни теми…

„Кај децата е пореметена социјализацијата, вредносниот систем. Тие не разликуваат постар – помлад, немаат кодекс на однесување. Денес не им нуди модел на однесување како порано, кога се знаело дека постариот треба да се почитува, се знаело каде е местото на детето, а каде на одговорниот, на постариот во семејството, на учителот, се знаело што е училиштето. Сега се доведовме до степен да децата се закануваат на наставниците, на постарите, никој нема авторитет над нив. Ова е голем аларм за сите родители, да ги остават мобилните телефони настрана и да се посветат на своите деца. Да ги научат што значи постаро лице, да ги научат на хиерархија на вредности. Голема е одговорноста на родителите. Да се разбудат! Не да одат во училиштата и да бараат високи оценки за децата, да се расправаат со наставниците, туку да ги научат децата да ги почитуваат, и да им вградат чувство за авторитет. Ако тоа чувство децата не го изградат додека се во училиште, понатаму во животот нема да имаат почит ниту кон државата, ниту кон полицаец, ниту кон било кого.“, вели психологот Билен Карахасан од Центарот за социјална работа Гостивар.

Долгото сурфање на интернет и играње секакви виртуелни игри ја пореметува претставата за реалноста, подвлекува тој.

„Голем дел од игрите што ги играат или тоа што го гледаат на интернет е исполнето со насилни содржини и децата повеќе време поминуваат во тој виртуелен свет отколку во реалниот. Таму убиваат некакви зомби, имаат оружје, и кога ќе се вратат во реалниот свет често доаѓа и до забуна кај нив, каде и што е самата реалност. Се покажа дека децата немаат чувство за болка, за губиток, не искажуваат сочувство. Родителите нека внимаваат како децата го трошат времето, какви содржини вреднуваат. И училиштата мора да издвојат простор и време да се дискутира на таа тема. Во спротивно, вака како што е денес имаме рецепт за катастрофа, каква што добивме во Србија, а таква катастрофа може лесно и нам да ни се случи.“, нагласува Карахасан.

По трагедијата во Србија, дел од децата манифестираат поддршка за ученикот кој пукаше, се поистоветуваат со него, па дури го копираа со правење листа со имиња на наставници и соученици со закани кон нив.

„Ваквите коментари треба да се сфатат многу сериозно од страна на професорите, да се повикаат родителите, тоа не е шала. Да се поработи со тие родители, дисциплински да делуваат на децата, не треба да помине како шала, ова во нашиот град може утре да се случи помина време на тоа кога работите ги гледавме површно, сега е време крајно дојдено да сфатиме дека е важно и да делуваме.“, предупредува психологот.

Стручните лица сметаат дека е потребно, особено периодов, по ваквото случување, во сите училишта да се одржат посебни часови за разговор и совети со учениците.