Дедо Мраз ги израдува децата кои се лекуваат на педијатрија во Гостивар

Децата пациенти на педијатриското одделение во гостиварската болница „Д-р Ферид Мурад“ имаа пријатно предновогодишно изненадување. Малите пациенти ги посети Дедо Мраз и им подари новогодишни пакетчиња. Активноста ја организираше здружението “When in Trouble” од Гостивар.

„Сакаме да внесеме барем малку радост и насмевки на лицата на дечињата кои за жал празничните денови ги поминуваат на лекување во болницата. Знаеме дека најмногу му се радуваат на Дедо Мраз и затоа решивме да им подготвиме вакво изненадување. Им посакуваме што побргу да оздрават и да имаат весело и среќно детство“, вели претседателката на здружението, Билјана Беловинова.

Медицинскиот персонал од детското одделение и родителите се заблагодарија на убавиот гест и вниманието кон дечињата кое секогаш е добредојдено.

Периодов што измина здружението “When in Trouble” организираше и учествуваше во бројни акции од хуманитарен карактер по повод новогодишние празнувања наменети за децата со посебни потреби, социјални семејства, стари лица и др.