Дефектни автобуси и комбиња возат во гостиварско – 14 исклучени од сообраќај

Вчера (20 март) од 8 до 13 часот, на подрачјето на Гостивар и Тетово, Секторот за внатрешни работи спроведе уште една акциска контрола за техничка исправност на возилата кои вршат јавен превоз на патници (автобуси, минибуси и такси комбиња).

Со контролата вкупно биле опфатени 128 возила, од кои 52 на гостиварското и 76 на тетовското подрачје. Од контролираните возила кај 25 биле откриени неисправни сопирачки и тоа 9 во Гостивар и 16 во Тетово. Пет од возилата во Гостивар имале неисправен уред за управување и едно, недостиг на опрема.

„Поради констатираните недостатоци, од сообраќај биле исклучени 30 возила, 16 во Тетово и 14 во Гостивар. Вкупно на 37 возачи изготвени им се прекршочни платни налози, а на осум, барања за поведување на прекршочна постапка. Согласно Законот за возила, паричните глоби за техничка неисправност на возилата се движат од 120 до 2000 евра во денарска противвредност, зависно од видот на прекршокот и дали станува збор за физичко или правно лице“, информира СВР.