Дел од пекарите со одлука да го поскапат лебот

Зголемувањето на цената на пченицата, како и на горивата во последната година ги натера дел од фирмите од пекарската индустрија во Македонија да го поскапат лебот. Се очекува новите цени да бидат 2 до 3 денари повисоки.

„Ова покачување од мелничко пекарската индустрија би било од 10 до 20 %, во зависност од типот на лебот и пекарата, за да се покријат загубите кои ги претрпуваме. Одлуката на секоја фирма е поединечна зависно од нејзината конкурентност, профит и други фактори “, велат од Мелничко-пекарското здружение при Стопанската Комора на Македонија.

Во врска со поскапувањето на лебот, Министерството за земјоделие излезе со став дека ја следат состојбата и доколку дојде до драстично зголемување на цените, што би влијаело врз поскапување на животниот стандард, ќе се интервенира преку Агенцијата за стокови резерви.

Последните зголемувања на цените на брашното и лебот беа напавени во 2007 и 2011 година, како резултат на поскапувањата на житните култури и нафтата. Според мелничарите, Македонија е земја каде се продава најевтиниот леб во Европа.