Ден на настава на турски јазик, единствен национален празник на Турците во Македонија

Припадниците на турската заедница во земјава денеска го одбележуваат Денот на настава на турски јазик, кој е единствен национален празник на Турците во Македонија и од 2007 година е неработен ден за нив.

Датумот 21 декември е избран според почетокот на изведување на наставата на турски јазик во 1944 година, во основното училиште „Тефејуз“  во Скопје.

Во Гостивар Денот на наставата на турски јазик се одбележа со манифестација во Центарот за култура АСНОМ. Програмата на настанот беше исполнета со рецитации и музички изведби од ученици, а го проследија просветни работници од гостиварските образовни установи, претставници на други институции и граѓани.