Ден со радост и креативност за дечињата со попречености во Гостивар

Денешниот ден беше посебен за децата со попречености од Гостивар, исполнет со убави моменти, споделување радост и креативност во склоп на фотографска работилница под менторство на фотографот Осман Демири.

Активноста ја организираше Здружението „Заедно можеме“. Децата низ дружба и во прошетка на градот добија можност да се запознаат со тајните на фотографирањето, а делата што ги создадоа ќе бидат изложени на аукција.

„Дружбата ја започнавме од Кејот на Вардар и ја продолживме на повеќе локации кои се специфични и препознатливи за Гостивар. Нашите ангели навистина уживаа, поминаа прекрасен ден од кој се родија убави фотографии и истите ќе бидат изложени на аукција која е планирана за наскоро.“, вели претседателот на здружението Шпенди Салија.

На аукцијата, исто така, за продажба ќе бидат изложени и уметнички дела кои децата ги создадоа под менторство на гостиварски уметници и во рамки на работилницата од неодамнешниот арт симпозиум во Струга. Средствата што ќе бидат собрани ќе се искористат за натамошни активости насочени кон децата со попречености.