Денес е Сретение Господово

Црквата го слави празникот Сретение Господово во споменот на значајниот настан во земниот живот на Исус Христос.  Во 40-от ден по раѓањето, според обичаите Богородица го донела Исус во Ерусалимскиот храм.  Во тоа време во Ерусалим живеел праведниот старец Симеон кој добил откровение дека нема да умре, додека не го види Спасителот. По небесно вдахновение, старецот дошол во храмот точно кога Пресвета Богородица и Јосиф го донеле Младенецот Исус за да го исполнат законскиот обред. Симеон го зел во раце и благословувајќи го Бога, изрекол пророштво за Спасителот на светот: Сега го отпушташ Својот раб со мир, Владико, според зборовите Твои, зашто очите мои го видоа спасението Твое, што си го приготвил пред лицето на сите народи, светлина за просветлување на незнабошците и слава на Твојот народ Израилот.

Празникот на Сретението Господово спаѓа во најстарите празници на христијанската Црква. Не го менува датумот и секоја година се слави на 15-ти февруари, односно 40 дена после Божиќ.