Денес се празнува Свети Јован Крстител

На 20-ти јануари (7-ми јануари според Јулијанскиот календар) православните верници го чествуваат празникот посветен на  Свети Јован Крстител. Според преданието, Јован го крстил Исус во водите на реката Јордан.
Проповедал богоморален живот и важел за вистински пророк меѓу народот. Неговиот живот завршил со отсекување на главата, по наредба на Царот Ирод, кон кого Свети Јован често упатувал укори заради развратничкиот живот.

Моштите на Јован Крстител се наоѓаат на неколку места низ светот, меѓу кои е и Бигорскиот манастир во Македонија. Токму во ова светилиште се наоѓа и чудотворната икона на Свети Јован Крстител.

Овој ден, дел од македонските семејства го имаат како домашна слава, а имендени прославуваат оние со име Јован, Јована, Јана.

Празникот уште се одбележува и како Женски Водици поради што главен збор во изведувањето на традиционалните обичаите имаат жените. Покрај другото, на овој ден жените одат по куќите од своето кумство.