Денес се слави Петровден

Наречен празник на врховните апостоли, денешниот датум 12 јули православниот свет го слави како празник на светите апостоли Петар и Павле.  

Со овој празник завршува еден од четирите повеќедневни пости во годината, кој е врзан за празникот на Апостолите. Апостолот Петар се смета за олицетворение на  цврстата и искрена вера, а Павле како целосно посветен на проповедањето на распнатиот и воскреснат Исус Христос. На иконите, светите апостоли Петар и Павле се претставени заедно: Петар со клучеви од рајот, а Павле со меч. Постојат различни народни верувања за овие двајца апостоли. Според едни Петар и Павле биле иста личност, според други, тие биле браќа.

Именден денес празнуваат: Петар, Петре, Петра, Петранка, Петруна…Утре на Павловден, именден слават: Павле, Пајо, Павлина…

Утрото на Петровден се оди во црква, а оној кој постел во Петровденскиот пост се причестува. На овој ден може и да се работи зашто е во време на најголемата жетва, а според верувањето дури и Св. Петар тој ден земал срп и жнеел.

Во минатото во Галичник на Петровден се негувала традиција на правење на свадбените веселби. Тогаш печалбарите доаѓале во родниот крај и масовно се венчавале. Некогаш во еден ден имало и по педесетина свадби.