Детска недела во градинките во Гостивар – Хуманоста се учи од мали нозе

Во рамки на одбележувањето на Светската недела на детето, во гостиварските градинки  Цветови, Пчелка и Пролет, Црвениот крст на Гостивар организиранаше хуманитарна акција. Дечињата донираа облека, обувки, играчки, а во знак на благодарност за хуманоста што ја искажуваат добија скромни подароци.

Настанот покажа дека дечињата од рана возраст со задоволство учат за вистинските вредности на солидарност и хуманост и знаат искрено да се радуваат на малите нешта.

„Овој настан ни стана како традиција и секоја година волонтерите од Црвениот крст доаѓаат кај нас во хумана мисија. Дечињата со радост донираат и токму тоа е нашата цел, да ја разбудиме хуманоста во најмалите“, изјави Мирјана Мицоска, директорка на ЈУ „Детска радост“ Гостивар.

Црвениот Крст ќе ги распредели донациите кои ги собраа дечињата до социјално загрозени семјества.

„Навистина радува фактот што и најмалите се вклучуваат во вакви акции, се учат колку значи кога помагаш некому кому му е потребно. Хуманостa се стекнува од најмала возраст и со текот на годините може само да расте“, рече по повод настнот Горан Михајлоски од Црвениот крст.

Светската недела на детето традиционално се одбележува секоја прва седмица од месец октомври. Освен денешната акција, во рамки на неделата во гостиварските градинки беа организирани посети на кошаркарите од КК Гостивар, на ученици и професори од музичкото училиште и други интересни активности за дечињата.