Детска недела во градинките во Гостивар: Мали деца големи срца!

Традиционално првата недела од месец октомври се одбележува како Светска недела на детето, а ЈУДГ ,,Детска Радост“ во чиј склоп се гостиварските градинки се приклучува кон одбележувањето со низа активности.

„Сите ние како дел од семејството, градинките, училиштата, установите за грижа и заштита на децата и други институции и органи имаме обврска да придонесеме за нивен правилен психофизички развој, да ги воспитаме и образуваме во духот на толеранцијата и прифаќање на различностите, да ги научиме како да одбегнуваат конфликтни ситуации и да го изберат дијалогот како начин на решавање на проблемите, со што ќе придонесеме детето да биде подготвено да живее во духот на мирот, достоинството, толеранцијата, слободата, рамноправно и солидарно со другите.“, нагласува директорката на градинките, Даниела Бошкоска.

За децата се организираат физички активности, ликовна колонија, музички хепенинг, хуманитарни акции и сл.

Детската недела годинава се одбележува под мотото ,,Мали деца големи срца“.