Џафери за вакцинацијата на пратениците: Сите имаат термин, но дали ќе се појават зависи од нив самите

Денес во салата „Борис Трајковски“ во Скопје се спроведува имунизацијата против ковид на пратениците во македонското собрание. Претседателот на Парламентот Талат Џафери рече дека ја завршил неговата обврска да ги стави на список сите 120 пратеници, а личен избор е дали ќе се вакцинираат.

„Претходно вакцина примија вработените во собраниските служби, денес почнува имунизацијата на пратениците. Со ова ќе се озозможи посоодветна работа на Собранието и се надевам од втората половина мај да се врати нормалната работа, секако со почитување на мерките и протоколите поставени од институциите. Сите 120 пратеници беа ставени на список, секој од нив добива порака за терминот на вакцинација, а нивна лична одлука е дали ќе дојдат, тоа е воља на секој поединец, битно е дека сите се предвидени, а кој како ќе одлучи е нивна работа.“, изјави Џафери.

Министерот за здравство Венко Филипче информираше дека процесот на вакцинација во земјава се одвива добро, а епидемиолошката состојба е стабилна со тренд на намалување на нови случаи и хоспитализации.

„Пратениците ќе ја примат вакцината Спутник, вакцинирањето е организирано во три групи. Дозволете да кажам дека процесот на имунизација се одвива добро на сите пунктови во земјава. Во однос на епидемиолошката ситуација, се бележат трендови на опаѓање, се намалува број на прегледи во сите градови и притисокот врз болниците за приеми е значајно намален. Викендов ќе започнеме и со ослободување на дел од одделенијата, кои беа ангажирани за третман на ковид пациенти.“, рече министерот.