Џамијата Балиу во Елбасан прогласена за верски објект со најубава архитектура во светот за 2025 година

Џамијата Балиу во албанскиот град Елбасан, ја освои првата награда за „Најубава верска архитектура во светот“ на меѓународниот натпревар „Зграда на годината 2025“ организиран од ArchDaily, најголемата глобална платформа за архитектура и дизајн.

Според муслиманската заедница на Албанија, оваа значајна награда ги потврдува уникатните вредности на оваа џамија, која ја комбинира традиционалната исламска архитектура со модерни елементи, создавајќи инспиративен простор за верниците и извонредно архитектонско уметничко дело.

Употребата на автентични материјали како камен, дрво и бакар, природно осветлување и симболични детали го прават овој култен објект иновативен модел и скапоцено богатство за албанското верско и културно наследство.

• Изборот и победата на џамијата на Балиу на овој престижен натпревар е несекојдневен настан не само за муслиманската заедница, туку и за цела Албанија. Како единствен верски објект во Европа, што ја добил оваа награда, џамијата сега е ставена во центарот на меѓународното внимание, што докажува дека албанското наследство и архитектура имаат важно место на глобалната сцена. Ова меѓународно признание е доказ за важноста на исламското наследство во Албанија и неуморната работа за зачувување и промовирање на духовните и архитектонските вредности на нашата земја, се наведува во соопштението на Муслиманската заедница на Албанија.

Исто така се додава дека овој успех немаше да биде возможен без придонесот и поддршката од различни страни.

• Посебна благодарност до архитектот Јуртин Хајро и Commonsense Studio за нивната визија и посветена работа во реализацијата на ова величествено дело. Исто така, благодарност до Амбасадата на Кувајт и сите оние кои великодушно ја поддржаа изградбата на оваа џамија и кои одиграа важна улога во реализацијата и финализирањето на овој монументален проект, наведува Муслиманската заедница.

Џамијата е со површина од околу 1.900 метри квадратни, се наоѓа во центарот на градот, и се состои од четири ката, кои покрај местото за молитва, вклучуваат и конференциски сали и канцеларии за персоналот на муфтиството во Елбасан.

Првиот објект на џамијата, според записите на Евлија Челебија, кој ја посетил истата, бил граден од 17 април 1608 до 6 април 1609 година. Градителот за оваа џамија напишал: „За доброто на Бога, Хасан Балиу го изградил овој Божји дом, кој наликува на рај“.