ДИК ги објави конечните резултатите од Парламентарните избори

Државната изборна комисија на јавна седница ги соопшти конечните резултати од предвремените Парламентарни избори што се одржаа на 15-ти јули.

Конечните резултати се објавуваат врз основа на записниците од Општинските изборни комисии и записниците од Избирачките одбори, рече претседателот на комисијата Оливер Дерковски.

Коалицијата „Можеме“ на СДСМ и БЕСА освоила 35,89% од гласовите и добива 46 пратенички мандати.

Коалицијата предводена од ВМРО ДПМНЕ освоила 34,57% од гласовите и добива 44 мандати.

ДУИ освоила 11,48% од гласовите и добива 15 мандати.

Коалицијата на Алијанса за Албанците и Алтернатива освоила 8,95% од гласовите и добива 12 мандати.

Левица освоила 4,1% од гласовите и добива 2 мандати

ДПА освоила 1,53% и добива 1 мандат.

Конститутивната седница на Собранието треба да се одржи најдоцна 20 дена од денот на одржување на изборите, што значи до 4 август. Седницата ја свикува претседателот на собранието од претходниот состав Талат Џафери.

Потоа, откако Парламентот ќе се конституира претседателот на државата има рок од 10 дена да му го даде мандатот за состав на нова Влада на партијата која има мнозинство пратеници. Мандатарот има рок од 20 дена од денот на доверувањето на мандатот, на Собранието да му поднесе програма и предлог состав на Владата.