Директорот на ТИРЗ, Гоце Димовски ги претстави економските можности на Македонија пред јапонски компании во Диселдорф

На бизнис семинар во Диселдорф, организиран во соработка со Јапонската организација за надворешна трговија (JETRO), директорот на Технолошко-индустриските развојни зони (ТИРЗ), Гоце Димовски, пред повеќе од 50 јапонски компании, меѓу кои гиганти како Тошиба, Мицубиши, Нипон стил, Мабучи Мотор и др., ги истакна економските можности и потенцијалите што ги нуди Македонија, како и новите владини мерки за поддршка на инвестиции.

„Македонската влада е непоколеблива во својата заложба за поттикнување на развиена економија. Наша примарна обврска и фокус се економијата и промоцијата на нови инвестиции. Со нови, таргетирани мерки, веќе ја менуваме инвестициската клима. Стануваме вистински партнери на бизнисот. Јапонија има огромен економски и инвестициски потенцијал и може да стане важен партнер за забрзан раст на Македонија. Благодарам на големиот интерес од јапонските компании. Силно верувам дека наскоро ќе ја видиме и првата јапонска инвестиција во земјава“, изјави Димовски.

Јапонските компании изразија задоволство од презентацијата и можноста директно да се запознаат со инвестициските можности во Македонија. Најмногу интерес покажаа за достапноста на квалификувана работна сила, предизвиците и критичните фактори при влез на македонскиот пазар и потенцијалот за соработка со македонските компании.

Настанот беше дополнително збогатен со обраќањата на јапонскиот амбасадор во Македонија, Оцука Казуја, како и генералните директори на ЏЕТРО во Виена, Варшава, Прага, Будимпешта и Букурешт, кои ги презентираа економските потенцијали на Балканскиот регион и Централна и Источна Европа.

Македонија, претставувана од директорот на ТИРЗ, имаше посебна презентација на економските можности, што ја означува нејзината единствена позиција и потенцијал како дестинација за инвестирање.

Овој бизнис семинар е дел од активностите кои следат по потпишувањето на Меморандум за соработка меѓу ТИРЗ и ЏЕТРО, чија цел е полесен влез на јапонски компании во Македонија и воспоставување поблиска соработка меѓу македонските и јапонските компании.