Добредојде за печалбарите во Гостивар со концерти, спортски активности, канцеларија за поддршка и бесплатна градинка за децата

Општина Гостивар во знак на добредојде на иселениците ќе организира повеќе културно-забавни и спортски активности. Од локалната самоуправа велат дека ќе се потрудат да им овозможат пријатен престој во родниот крај за време на летните одмори.

„Првиот чекор што го презеде Општина Гостивар во оваа насока, е реактивирање на Канцеларијата за иселеници во рамките на општинската администрација од 1 јули, која ќе биде отворена до 31 август, а ќе дава бесплатни услуги 12 часа на ден. Покрај тоа, за време на нивниот престој во родниот крај, на иселениците ќе им се овозможи бесплатно да ги носат децата од предучилишна возраст во гостиварските градинки, за што веќе е обезбеден дополнителен кадар, како и следење на бесплатни курсеви по албански јазик“, информираат од општината.

Во рамки на “Денови на иселениците” ќе се организираат повеќе културно-забавни и спортско-рекреативни активности кои ќе започнат на 15 јули (недела) на градскиот плоштад со Стенд ап комедија на комичар Хашим Мемиши Сопи. Предвидени се уште две други театарски претстави, неколку концерти, детски квиз на знаење, турнир во мал фудбал, шаховски турнир и Тјунинг шоу со авотмобили.

„Општина Гостивар, иселениците ги смета како мошне важна категорија на граѓани, и на локално и на централно ниво, затоа со цел тие да не ги раскинат врските со татковината и да останат и понатаму клучен фактор за економскиот развој на земјава, ќе вложи максимални напори нивниот престој во родниот крај, да им го направи поатрактивен и да ги привлече помладите генерации редовно да го посетуваат Гостивар“, нагласуваат општинските власти.