Добри гости му дојдоа на Гостивар и порачаа: Да се чуваат фолклорот и традициите!

Гостивар денес е домаќин на Регионалната ревија на песни, музика и игра за пензионери, која се одржува по 21-ви пат. Настанот е во организација на Сојузот на здруженијата на пензионери на Македонија, а домаќин е Здружението на пензионери Гостивар, Маврово Ростуше и Врапчиште.

Учествуваат претставници на пензионерските здруженија од: Охрид-Дебарца, Струга, Дебар-Центар Жупа, Лабуниште, Кичево, Вевчани и Македонски Брод.

„Мене како претседател на Здружението домаќин ми претставува посебна чест и задоволство што оваа ревија се одржува во Гостивар. Сакаме да покажеме дека сме сплотени, заедно без оглед на вера и нација со една цел да ги негуваме фолклорот, традициите, убавата музика. Тоа е и нашата порака до младите генерации, да ги чуваат овие вредности.“, изјави претседателот на гостиварското здружение, Нијази Џелили.

Регионалната ревија се одржува во големата сала на Центарот за култура АСНОМ. При пристигнувањето и пречекувањето на учесниците, оро со зурли и тапани се играше и пред објектот.

За сите здруженија кои се дел од настанот предвидени се посебни благодарници, а средбата ќе се заокружи со заеднички ручек и дружење.