Дојави за бомби и во училишта во Гостивар

Утрово и во основни и средни училишта во Гостивар имало дојави за бомби. Од управите на повеќе образовни установи за Gostivarpress.mk потврдија дека на мејл утрово добиле дојави за поставени бомби.

„Пораката беше добиена утрово на мејл адресата на училиштето, по што веднаш беше постапено како што треба, учениците од прва смена се пуштени дома, а крим техника од полиција врши проверки“, потврдија од гостиварската гимназија.

И во ОУ „Гоце Делчев“ учениците од првата смена се пуштени дома по дојава за бомба, која исто така стигнала утрово на мејл. Полициски екипи се на местото и се вршат проверки, потврдија од училиштето.

Проверки поради дојава за бомба се вршат и во ОУ „Мустафа Ќ. Ататурк“.

Дојави за бомби имало и во други гостиварски училишта, како и низ школи во повеќе градови низ земјава.