Донирани компјутери, инвертер, логички игри за Центарот на „Заедно можеме“ во Гостивар

Децата со посебни потреби што го посетуваат новоотворениот Центар на здружението „Заедно можеме“ во Гостивар, наскоро ќе се вклучат во обуки за компјутерски вештини. Центарот доби донација од 4 компјутери, кои ќе се користат за таа намена.

Освен компјутери, донацијата која стигна од Исламскиот центар Ел Фуркан од Германија содржи и инвертер клима, печатар како и комплети со логички игри.

„Голема благодарност до Афет Рушити кој секогаш е подготвен да помогне за своето родно место, како и до Имерлие Салиу, која ја координираше оваа донација. Сега ни доаѓа месецот Рамазан, по кој повод, Исламскиот центар од Минхен обезбеди и ифтар за 25 семејствата на деца кои доаѓаат во нашите простории“, рече Шпенди Салија, претседател на „Заедно можеме“

Центарот на здружението „Заедно можеме“ се отвори со финансиски средства собрани преку донации, а услугите што ги пружа се бесплатни.

Децата го посетуваат центарот поделени во две групи, по два пати неделно. Петокот е ден резервиран за активности на отворено, прошетки, екскурзии и слично.